पोर्चुगलको AIMA Agência para a Integração, Migrações e Asilo ले युरोपियन युनियनको “FAMI 2030” (Asylum, Migration and Integration Fund) कार्यक्रम अन्तर्गत सञ्चालन भइरहेको शरणार्थी पुनर्स्थापना तथा मानवीय प्रवेश सम्बन्धी परियोजनाको प्रगति विवरण सार्वजनिक गरेको छ। उक्त कार्यक्रम आप्रवासन व्यवस्थापनलाई सुदृढ बनाउने, अन्तर्राष्ट्रिय संरक्षण आवश्यक परेका व्यक्तिहरूलाई सुरक्षित रूपमा सदस्य राष्ट्रहरूमा स्थानान्तरण गर्ने तथा सामाजिक समावेशीकरणलाई प्रवर्द्धन गर्ने उद्देश्यले सञ्चालन गरिएको हो।
उपलब्ध आधिकारिक विवरण अनुसार “Reinstalação e Admissão por Motivos Humanitários 2025” परियोजनाअन्तर्गत हालसम्म 258 जना व्यक्तिलाई पुनर्स्थापना (resettlement) प्रक्रियामार्फत पोर्चुगल ल्याइएको छ भने थप 36 जनालाई मानवीय आधारमा प्रवेश अनुमति प्रदान गरिएको छ। यो प्रक्रिया विशेषगरी युद्ध, द्वन्द्व, राजनीतिक अस्थिरता वा मानवीय संकटका कारण आफ्नो देश छोड्न बाध्य भएका र अन्तर्राष्ट्रिय संरक्षण आवश्यक परेका व्यक्तिहरूलाई लक्षित गरिएको हो।
FAMI 2030 कार्यक्रम युरोपियन युनियनको दीर्घकालीन रणनीतिक पहलअन्तर्गत सञ्चालन भइरहेको छ, जसले सदस्य राष्ट्रहरूबीच जिम्मेवारी बाँडफाँड, सुरक्षित तथा व्यवस्थित आप्रवासन प्रणाली र शरणार्थी व्यवस्थापनमा सहकार्यलाई मजबुत बनाउने लक्ष्य राखेको छ। यस कार्यक्रमअन्तर्गत पोर्चुगललाई उल्लेखनीय बजेट उपलब्ध गराइएको छ, जसले शरणार्थी स्वागत, बसोबास व्यवस्थापन, कानुनी सहयोग तथा सामाजिक एकीकरणका क्षेत्रमा लगानी गर्न सहयोग पुर्याउनेछ।
सम्बन्धित निकायका अनुसार यस परियोजनामा परिवार, बालबालिका तथा अन्य संवेदनशील अवस्थाका व्यक्तिहरूलाई प्राथमिकतामा राखिएको छ। पुनर्स्थापना प्रक्रियामार्फत व्यक्तिहरूलाई सुरक्षित रूपमा पोर्चुगल ल्याइने तथा आवश्यक आधारभूत सेवा, आवास, स्वास्थ्य सेवा र सामाजिक सहयोग उपलब्ध गराइने व्यवस्था गरिएको छ।
यससँगै AIMA ले स्पष्ट पारेको छ कि उक्त कार्यक्रम सामान्य कामदार आप्रवासी, रोजगारीका लागि आउने विदेशी नागरिक वा भिसा आवेदन प्रक्रियासँग सम्बन्धित छैन। यो पूर्ण रूपमा शरणार्थी तथा अन्तर्राष्ट्रिय संरक्षण आवश्यक परेका व्यक्तिहरूका लागि मात्र लक्षित मानवीय कार्यक्रम हो।
पोर्चुगलले युरोपियन स्तरमै समन्वय गर्दै शरणार्थी व्यवस्थापन तथा मानवीय सहयोगमा आफ्नो भूमिका विस्तार गरिरहेको सन्दर्भमा यस कार्यक्रमलाई महत्वपूर्ण कदमका रूपमा हेरिएको छ।
Source: FAMI 2030 (EU) | AIMA Portugal Official Informatio